Periklis Iakovakis

Periklis Iakovakis (fødd 24. mars 1979) er ein gresk tidlegare friidrettsutøvar frå Patras som vart europameister på langhekken i 2006, og vann bronsemedaljen i øvinga under friidretts-VM 2003.

Iakovakis tok steget opp mot verdseliten på 400 meter hekk då han i 2001-sesongen vart klokka inn på 48,87 sekundar. Året etter forbetra han den personlege rekorden til 48,66, og han kom på femteplass i friidretts-EM i München. Under verdsmeisterskapen 2003 vann han sitt semifinalefelt på gresk rekord, 48,17. I finalen tok han bronsemedaljen på sterke 48,24, like bak sølvmedaljøren, men nesten sekundet bak den suverene verdsmeisteren, Félix Sánchez.

I mai 2006 sprengde Iakovakis 48-sekundsgrensa for fyrste gong. Han kom i Osaka i mål til 47,82 sekundar. Under europameisterskapen i Göteborg i august månad vann han gullet etter 48,46 sekundar. Like etter EM fekk han notert 47,92 då hann sigra i Weltklasse-stemnet i Zürich.

Også i åra etter 2006 heldt Iakovakis fram med å kvalifisere seg til finalane på 400 m hekk i dei store meisterskapane, utan å kunne innkassere medaljar. Etter 2010-sesongen presterte han på eit lægre nivå, og la bort løpsskorne då Sommar-OL i London var over.

• VM 1999 i Sevilla: Utslått i forsøka (nr 17 – 49,53)
• OL 2000 i Sydney: Utslått i forsøka (nr 25 – 50,20)
• VM 2001 i Edmonton: Utslått i semifinalane (nr 14 – 49,38)
• EM 2002 i München: Nr 5 – 49,07
• VM i 2003 i Paris: Bronsemedalje – 48,24
• OL 2004 i Aten: Utslått i semifinalane (nr 11 – 48,47)
• VM i 2005 i Helsinki: Utslått i semifinalane (nr 13 – 49,28)
• EM 2006 i Göteborg: Gullmedalje – 48,46, framom Marek Plawgo (48,71)
• VM 2007 i Osaka: Nr 6 – 49,25
• OL 2008 i Beijing: Nr 8 – 49,96
• VM 2009 i Berlin: Nr 5 – 48,42
• EM 2010 i Barcelona: Nr 5 – 49,38
• EM 2012 i Helsinki: Nr 8 – 50,57
• OL 2012 i London: Utslått i forsøka (nr 32 – 50,27)