Haezebroek

Haezebroek Hazebrouck

Haezebroek in 't arroundissement Duunkerke 50° 43' N, 2° 32' E
Geografie
Regio	Hauts-de-France
Departement	Noorderdepartement
Arroundissement	Duunkerke
Kanton	Haezebroek
Coördinoatn	{{{latitudeGraden}}}°{{{latitudeMinuten}}}′NB {{{longitudeGraden}}}°{{{longitudeMinuten}}}′OL
Ippervlak	26,2 km²
Inweuners
Inweuners Bevolkiengsdichtheid	21.785 (2022) 828 inw./km²
Andere
Burgemêester	Valentin Belleval 2020-2026
Postcode	59190
Webadres	Haezebroek

Haezebroek^[1] ofte Hoazebroek (Frans: Hazebrouck, Nederlands: Hazebroek) es 'n stad en gemêente in Vrankryk in 't Noorderdepartement. 't Ligt in Fransch-Vlaenderen, in 't midd'n van de Fransche Westhoek.

Geografie

Haezebroek grenst an de gemêentn Hondeghem, Kaester, Borre, Noordberkin, Moerbeke en Woalskapelle.

Haezebroek ligt in 't Frans-Vlamsche Houtland. Der weun'n mêer of 20.000 mienschn, en 't es doamee de grotste stad in 't binn'nland van d'n Franschn Westhoek.

Geschiedenisse

An zyn noame kun je ol ziene da Haezebroek Vlams wos in 't verleen. En Haeze is e bêestje dat op e keun trekt en broek wilt "moeras" zeggn. In 't begun wos 't stadje nie mêer of e drassig bus. 't Dorp es nen êestn kêe vermeld round 't joar 1000 ounder de noame Hasebroch. In 1122 wierd et eschreevn lyk Hasbruc. 't Is moa sedert 1678 mè de Vrede van Neymeegn da 't gebied voegoed Frans kwam, achter da Lodewyk XIV grôote dêeln veroverd ha van 't groafschap Vloandern, da ip da moment en ounderdêel wos van de Spoansche Nederlandn.

Tusschn 1857 en 1926 wos Haezebroek d'ôofdplekke van't arroundissement Haezebroek, da 't zuudelyk gedêelte van't uudige arroundissement Duunkerke oumvattigde (zynde 't groundgebied van de vroegere kasselry'n Kassel en Belle). In Haezebroek koutigd'n ze nog Frans-Vlams tout in de twingtigste êeuwe, mor dad es surtout achter d'n Êestn Weireldoorloge styf ard verminderd en nu zyn der nog mo letter mienschn die Vlams klappn.

Beziensweirdigeedn

De Sint-Elôoiskerke, e loat-gotische Hallekerke uut 1432
D'Ouze-Lieve-Vrouwekerke
D'Illig-Èrtekerke
't Stadhuus uut 1820 in classicistischn styl
't Vroegere Ogustieneklôoster uut de zestiende êeuwe da gebouwd es in d'n styl van de Vlamsche renaissance, woar da nu 't steedelyk muuzee in es
't Vroeger uus van Jules Auguste Lemire, da nu ôok e muuzee es
De reuzn van Haezebroek lik Tisje-Tasje en Roland van Haezebroek
De Vlamsche meulns in 't rounde
In en round Haezebroek liggn der ôok êenigte Iengelsche soldoatekerkoovn uut d'n Êestn Weireldoorloge:
- 't Cinq Rues British Cemetery, mè mêer of 200 groavn
- La Kreule Military Cemetery, mè mêer of 500 groavn
- Ôok ip't Sint-Elôoiskerkof, êen van de gemêentelyke begroafplekkn, ligter e perk mè ounderd'n ôorlogsgroavn

Verkêer en vervoer

Haezebroek ligt nie direkt an en ottostroade, mor es wel e knooppunt van geweune boan'n tusschn de steed'n Belle, Stêenvoorde, Kassel en Sint-Omoars.

In Haezebroek ligt er e stoasje an de kruuschienge van twêe yzerbaene: de lynne Rysel-Kales (ôost-westverbindienge) en de lynne Duunkerke-Atrecht (nôord-zuudverbindienge). In tydde woarn der nog twêe lynn'n mêer: die van Haezebroek noar Meregem en dedie van Haezebroek noa Boeschepe en De Schreve (die in 't verlengde lag van de West-Vlamsche lynne 69 van Kortryk noar Poperienge). De twêe latstgenoemde yzerboan'n zyn ondertusschn ipgebrookn. In de stoasje van Hoazebroek passeern en stoppn der antins ôok TGV's die ry'n van Parys oovr Atrecht richtienge Duunkerke.

Deur 't groundgebied van de gemêente, o de nôordkantn van 't center, ligt ôok en aparte spoorlynne vo TGV's tusschn Rysel en Kales en ezo vodder noa d'n tunnel ounder 't Iengels Kanoal. Dedie ligt niet an de stoasje en ezo kunt den tring in êen trek deure ry'n.

Bekende inweuners

Maria Petyt: begynne, mystica en schryfster
Jules Auguste Lemire: paster en politieker, burgemêester van Haezebroek van 1914 tout 1928 (oloewel dat 'n eigntlyk in Oud-Berkyn geboorn es)
Cédric Vasseur: coureur