Guido Gezellepling

't Guido Gezelleplein is te vienn in 't êrte van Brugge.

Achtre da in 1906 e proalgraf was ipgericht ip 't Brugs kerkof, vo doa 't stofflik oovreschot van Guido Gezelle in te bewoarn, wierd beslist van ook in de binnestad e monument vo zyn noagedachtenisse ip te trekkn. 't Initiatief doavôorn kwam in d' êeste plekke van 't Davidsfonds.

't Wierd e leevnsgrôot bronzn stanbeeld deur de beeldhowre Jules Lagae. 't Wierdr in 1930 ingehuldigd, in anweezigeid van keunienk Albert I en keuneginne Elisabeth. 't Monument wierd geplatst ip 't pling dat toe tonne de noam Onze-Lieve-Vrouw-Kerkhof Nôord droeg. In 1963 besliste 't stadsbestier de noame te verandern in Guido Gezellepling, iermee ofiesjêel bevestigend tgêen al lange in de vôksmoend azôo hêetn was.

• (nl) Schoutteet, Albert 1977 : De straatnamen van Brugge. Oorsprong en betekenis, Brugge, ISBN 9789062675036.
• (nl) Vanhoutryve, André 1989 : Guido Gezelle, in : Brugse stand- en borstbeelden, Sint-Andries, blz. 160-199.
• (nl) Weymeis, Chris 2012 : Brugge van Academiestraat tot Zwijnstraat. Deel 2 (E tot I), Brugge.