V2

Lo V2 (de l'alemand Vergeltungswaffe 2^[1]) èra un missil balistic desvolopat per Alemanha dins lo corrent de la Segonda Guèrra Mondiala. Considerat coma lo premier missil balistic de l'istòria, èra destinat a l'ataca dei vilas aliadas, principalament Londres e Anvèrs, en represalhas ai bombardaments aliats. Aquò mau capitèt car lo morau dei populacions visadas foguèt pas tocat. La construccion dei missils èra tanben costosa per l'economia alemanda e l'eficacitat deis atacas èra limitada per la manca de precision dau missil. Pasmens, la cèrca e la destruccion dei posicions de tir dei V2 mobilizèron de fòrças importantas dins lo camp aliat.

Après la guèrra, lei V2 foguèron fòrça estudiats per lei venceires. Venguèron la basa dei missils balistics modèrnes utilizats dins l'encastre de la dissuasion nucleara e dei fusadas espacialas. Lo director dau projècte V2, l'engenhaire Wernher von Braun (1912-1977), venguèt ansin una figura emblematica de la NASA durant la Guèrra Freja.