Sean Charles Dunn (1987 o 1988), mai conegut per son escais Sandwich Guy (çò es "lo tipe de l'entrepan"), es un ancian militar e foncionari del Departament de Justícia dels Estats Units. Venguèt famós mondialament a partir de la viralitat d'una vidèo[1] que mostrava cossí lo 10 d'agost de 2025 s'opausèt a un agent de la CBC (Polícia de las frontièras) dins un barri istoricament important de Washington, D.C., lo U Street Corridor[2], e qu'aprèp li aver dich "Why are you here? I don’t want you in my city!" ("Perqué siás/sètz aicí? Te/vos volèm pas dins ma vila") e acusat d'èsser fascista(s)[3], escampèt l'entrepan qu'aviá sul policièr abans d'èsser corsat per las fòrças policialas.
Persona vestida d'entrepan de Subway
Gaireben immediatament aprèp son arrestacion, Dunn, un veteran de la Fòrça Aeriana dels Estats Units que serviguèt a Kandahar (Afganistan) de 2010 a 2011 e recebèt mai de 12 guerdons militars durant son servici[4], es estat bandit de son emplec al Burèu d'Afars Internacionals per la Procuradora generala dels Estats Units Pam Bondi.[5] Aliberat durant la matinada seguenta, l'activista ensagèt de consultar un avocat tre que s'assabentèt qu'un òrdre de detencion èra estat emés. Pr'aquò abans qu'o poguèsse far, foguèt arrestat dins son apartament per una tropa de 20 oficièrs[6] demest los que i aviá de marshalls e de membres del FBI armats, e mai amb un bloquièr.[7]
L'acusacion dirigida per Jeanine Pirro, la procuradora federala de Washington, una jurista sensacionalista conspiracionista e una abituada del canal Fox News[8], acusèt puèi Sean Dunn de delicte d'agression, çò que podriá valer un an de preson[9], mas lo grand jurat federal rebutèt aquò e una possibla inculpacion d'aqueste "eròi de la resisténcia"[10] per aquel acte lo 26 d'agost.[11][12] Aprèp aquesta novèla rebutada de las acusacions de Pirro a nivèl federal, lo Sandwich Guy es estat inculpat per infraccion menora lo 28 d'agost de 2025.[13]
Tre aquel moment lo Sandwich Guy, e mai aquel tipe d'entrepan vendut per l'entrepresa Subway[14]
, es vengut un dels simbòls de la resisténcia fàcia a la repression menada pel president Donald Trump e son govèrn.[15], mai que mai a Washington, D.C. dempuèi son ocupacion per la gàrdia nacionala[16]. Qualques murals simbolizant l'acte de resisténcia del Sandwich Guy, faches a l'estil de Banksy, son apareguts dempuèi aquela confrontacion dins divèrses endreches de la capitala federala dels Estats Units,[17] e d'entrepans son frequentament auborats dins las manifestacions.[18][19]
