Operacion Cerberus

L’Operacion Cerberus es una operacion de la marina militara alemanda durant la Segonda Guerra Mondiala. L'objectiu èra d'evacuar l'escadra desplegada a Brèst per la relocalizar dins los pòrts alemands de la mar del Nòrd. D'efiech, Hitler crenhiá un desbarcament britanic en Norvègia e voliá dispausar de la poténcia de fuec d'un maximom de naviris de combat. Lo 11 de febrier, tres crosaires quitèron donc Brèst amb una escòrta compausaa de 6 destroièrs, de 14 torpilhaires e de 32 vedetats armaas de torpilhas. 300 avions èran pereu disponibles per assegurar la proteccion aeriana del cortegi. L'itinerari chausit foguèt un trajecte directe dins la Marga.

Los Britanics foguèron susprés per aquela sortia e posquèron pas coordinar una defensa eficaça. Perdiguèron ansin 42 avions dins de temptativas mancaas de bombardament e foguèron pas en mesura de mobilizar una flòta importanta per interceptar los Alemands. En particular, los destroièrs encharjats de protegir lo pas de Calais foguèron dispersats per los tirs dels Alemands. L'unica tactica eficaça foguèt l'utilizacion de minas. Un crosaire, lo Scharnhorst, foguèt seriosament endaumatjat per doas explosions e foguèt blocat per tres mes en causa de las reparacions. Pasmens, per los Alemands, lo succès tactic de l'operacion èra egalament una desfacha estrategica amb l'abandon definitiu de l'ocean Atlantic per la flòta de susfàcia alemanda.