Mayapan

Mayapan es un important site arqueologic maia situat en Yucatan a 40 km al sud-est de Merida e 100 km a l'oest de Chichen Itza. Ocupa una superficia de 4 km² amb 4 000 estructuras identificaas a l'interior de sas muralhas^[1]. Es un luec toristic, mas atira mens de visitaires que los sites pus impressionants de Chichen Itza o d'Uxmal.

En 1221, los Maias de las regions centralas se revoutèron còntra la dinastia maia-tolteca de Chichen Itza. Après una breva guerra civila, los insurgents venguèron la novela potença dominanta dins l'espaci maia. Puei, menats per la dinastia dels Cocomes, chausissèron Mayapan, una vila fondaa vers 1050, per i installar lor capitala. Lo site foguèc alora l'objecte de trabalhs importants per i bastir una vila forticaa e dotaa d'infrastructuras relativament importantas. A son apogeu, sa populacion totala es estimaa entre 6 000 e 15 000 abitants^[2]. Pasmens, lo teissut urban demorèc mens desvolopat que dins los centres urbans dels periòdes precedents. Per exemple, la piramida centrala es una version reducha del Castillo de Chichen Itza. Mayapan mantenguèc son egemonia politica durant a pauc près dos segles, mas dins los ans 1440, una revòuta menaa per los Xius entraïnèc la destruccion e l'abandon de la ciutat.

• Civilizacion maia.
• Cocomes.

• (en) Robert J. Sharer, The Ancient Maya, Stanford University Press, 2006.

1. ↑ (en) Robert J. Sharer, The Ancient Maya, Stanford University Press, 2006, p. 594.
2. ↑ (en) Joyce Kelly, An Archaeological Guide to Mexico's Yucatán Peninsula, University of Oklahoma Press, 1993, p. 37.