Lev Kamenev (18 de julhet de 1883, Moscòu - 25 d'aost de 1936, Moscòu) es un cap revolucionari e òme politic sovietic.
Espós de la sòrre de Trotski, venguèt un important collaborator de Lenin a partir de 1902. Arrestat en 1914, foguèt exiliat en Siberia fins a la Revolucion de Febrier. A son retorn, èra puslèu favorable a una politica concilianta envèrs lo Govèrn Provisòri e s'opausèt ai Tèsis d'abriu de Lenin. S'opausèt tanben a l'insureccion armada en octòbre. Aquò l'empachèt pas de venir president dau Soviet de Moscòu (1918-1926), d'intrar au Politburo (1925) e de venir vice-president dau Conseu dei Comissaris dau Pòble (1922-1925). En 1923, se raprochèt d'Estalin e de Zinoviev per s'opausar a l'ala radicala dau Partit e ai trostkistas. Pasmens, Kamenev foguèt escartat de la direccion dau país en 1925 après aver sostengut una temptativa de reduccion dei poders d'Estalin. S'alièt alora amb Trostki e l'ala senèstra, mai aquela coalicion foguèt batuda en 1927. Kamenev perdiguèt sei responsabilitats e foguèt excluch dau Partit. En 1935, foguèt accusat d'aver organizat un complòt per assassinar Estalin. Condamnat a mòrt durant lei procès de Moscòu, foguèt fusilhat lo 25 d'aost de 1936.
