HMS Dreadnought

Lo HMS Dreadnought foguèt un cuirassat de la marina militara britanica armat lo 2 de decembre de 1906. Dotat d'un blindatge, d'una poissança de fuòc e d'una velocitat sensa equivalent a son intrada en servici, revolucionèt la concepcion dei cuirassats e entraïnèt una importanta corsa ais armaments navaus entre lei grandei poissanças dau periòde, especialament lo Reiaume Unit e Alemanha. D'efèct, a respèct dei generacions precedentas de cuirassat, presentava mai d'un melhorament important :

• sa velocitat importanta (21 nòs), assegurada per de turbinas de vapor, li permetiá d'escapar ai tirs de torpilhas.
• son artilhariá principala (10 canons de 305 mm) aviá una poissança e una portada superioras a totei leis autrei naviris en servici.
• lo contraròtle dau tir èra assegurada per de telemètres optics permetent de melhorar l'observacion e la precision.
• lei luòcs de vida foguèron modificats per raprochar lei marins de son pòste (avans 1906, l'organizacion èra totjorn aquela de la marina de vela).

Naviri amirau de la Home Fleet britanica de 1907 a 1912, lo HMS Dreadnought venguèt rapidament obsolèt en causa de la construccion de cuirassats encara pus poderós. De mai, lei progrès dei torpilhas permetèron tornarmai ai torpilhaires e ai sosmarins de lo menaçar. Au començament de la Premiera Guèrra Mondiala, lo cuirassat èra donc solament naviri amirau dau quatren escadron de la Home Fleet. Durant lo conflicte, son accion principala foguèt la destruccion dau sosmarin alemand U-29 lo 18 de març de 1915. Participèt pas a la batalha de Jutlàndia en causa d'operacions de maintenança e foguèt desarmat en 1920 après lo conflicte.

• Cuirassat.