Copa Santa

Lo cant de la Copa Santa o pus exactament La Cançon de la Copa (en grafia mistralenca originària: Coupo Santo, La Cansoun de la Coupo ) foguèt escrich per Frederic Mistral sus una musica de Micolau Sabòli, es l'imne dau Felibritge, es considerat per d'unei coma l'imne de Provença e tanben coma un imne de tota Occitània au costat de Se canta.

Mistral escriguèt aqueu cant en referéncia a una copa d'argent que lei felibres catalans la porgiguèron ais felibres provençaus pendent una taulejada que se tenguèt a Avinhon lo 30 de julhet de 1867, per grandmercejar lei provençaus qu'avián aculhit lo poèta catalan Víctor Balaguer, quand aqueste darrier foguèt exiliat politic en Provença. Aquela copa es l’òbra de l'escultor Guihèm Fulcònis e de l’argentier Jarry.

Provençaus, vaicí la copa
Que nos ven dei catalans:
A de reng beguem en tropa
Lo vin pur de nòste plant !

repic
Copa santa,
E versanta,
Vueja a plens bòrds,
Vueja abòrd
Leis estrambòrds
E l'enavans dei fòrts!

D'un vièlh pòble fièr e libre
Siam bensai la finicion;
E se tomban lei felibres,
Tombarà nòsta nacion.

D'una raça que regrelha
Siam bensai lei promiers greus;
Siam bensai de la patria
Lei cepons e mai lei prieus.

Vueja-nos leis esperanças
E lei raives dau jovent,
Dau passat la remembrança
E la fe dins l'an que ven.

Vueja-nos la coneissença
Dau verai e mai dau bèu,
E leis autei joïssenças
Que se trufan dau tombèu.

Vueja-nos la Poesia
Per cantar tot çò que viu,
Car es ela l'ambrosia
Que tremuda l'òme en dieu.

Pèr la glòria dau terraire
Vautres enfin que siatz consents,
Catalans de luenh, ò fraires,
Comuniem toteis ensems!

Prouvençau, veici la Coupo
Que nous vèn di Catalan :
A-de-rèng beguen en troupo
Lou vin pur de nostre plan

refrin Coupo Santo
E versanto
Vuejo à plen bord,
Vuejo abord
Lis estrambord
E l'enavans di fort !

D'un vièi pople fièr e libre
Sian bessai la finicioun ;
E, se toumbon li felibre,
Toumbara nostro nacioun

Coupo Santo...

D'uno raço que regreio
Sian bessai li proumié gréu ;
Sian bessai de la patrìo
Li cepoun emai li priéu.

Coupo Santo...

Vuejo-nous lis esperanço
E li raive dóu jouvènt,
Dóu passat la remembranço,
E la fe dins l'an que vèn,

Coupo Santo...

Vuejo-nous la couneissènço
Dóu Verai emai dóu Bèu,
E lis àuti jouïssènço
Que se trufon dóu toumbèu

Coupo Santo...

Vuejo-nous la Pouësìo
Pèr canta tout ço que viéu,
Car es elo l'ambrousìo,
Que tremudo l'ome en diéu

Coupo Santo...

Pèr la glòri dóu terraire
Vautre enfin que sias counsènt.
Catalan, de liuen, o fraire,
Coumunien tóutis ensèn !

Coupo Santo...

• Aria MIDI, paraulas e traduccion en francés, e particion.
• Copa Santa (Wikisource)

• Portal de Provença