Catilina

Lucius Sergius Catilina (vèrs 108, Roma - genier de 62 avC, Pistòia) es un òme politic roman conegut per sa conjuracion còntra lo Senat e la Republica Romana.

Eissit de la gens Sergia, un ostau de l'aristocracia auta, s'engatjèt en politica dins lo camp conservator en sostenent Sulla durant lei guèrras civilas còntra lei partisans de Marius. Se destrièt per sa crudelitat durant lei proscripcions. Après lo conflicte, foguèt implicat dins d'escàndols grèus coma un afaire d'incèst amb una vestala^[1]. Foguèt aquitat e venguèt pretor en Africa en 68 avC. S'entornèt a Roma dos ans pus tard onte foguèt accusat de concussion per sa gestion de la província, mai un còp de mai, foguèt aquitat. Aquel afaire l'empachèt pasmens de presentar sa candidatura ais eleccions consolaras de 66 avC. Catilina constatèt tanben l'ostilitat creissenta dei conservators, menats per Ciceron, envèrs eu.

Decidèt donc de cambiar de camp e de se raprochar dei populares, la faccion opausada ai conservators romans. Dins aquò, foguèt tornarmai batut ais eleccions consolaras de 64 avC. Amb sei partisans, comencèt alora de preparar un còp d'Estat, mai la conjuracion foguèt desvelada. Ciceron, cònsol, revelèt lo complòt au Senat e organizèt la repression. Catilina poguèt s'enfugir e rejónher l'armada dei conjurats, mai la màger part de sei complicis foguèron arrestats e executats. Limitada a 3 000 òmes, son armada foguèt anientada a la batalha de Pistòia e Catilina foguèt tuat durant lei combats.

• Ciceron.

• (fr) Pierre Grimal, Cicéron, París, Fayard, octòbre de 1997, 478 p., cap. VIII (« Le consulat »).

1. ↑ Dins lo drech roman, tota relacion sexuala amb una vestala èra considerada coma un afaire d'incèst, que que siegue la natura vertadiera dei relacions familhalas entre leis acusats.