Batalha d'Imphal
 La batalha d'Imphal se debanèc entre març e julhet de 1944 durant la Segonda Guerra Mondiala. Es lo combat centrau de l'operacion U-Go, una ofensiva menaa per las fòrças japonesas presentas en Birmania en direccion dau nòrd de l'Índia Reiaume Unit. L'enjòc èra lo contraròtle d'Imphal, posicion importanta entre los dos país, mas en parallele, un combat important opausèc egalament los dos camps Kohima per tenir la rota permetent d'avitalhar los Britanics a Imphal. Lo 8 de març, los Japonés ataquèron las posicions defensivas de la ribiera Chindwin e susprenguèron los Britanics. Lo 25, après de combats violents, los atacaires ocupèron Tamu e Moreh, mas los Britanics poguèron se retirar sensa dificultat. Lo 25, los combats comencèron a l'entorn d'Imphal onte los dos camps concentrèron pauc a cha pauc la màger part de sas tropas disponiblas (85 000 per los Japonés e 120 000 per los Britanics). Los Japonés conquistèron una partia de las posicions britanicas al sud de la vila, mas foguèron blocats per l'arribaa de renfòrç. En abriu, las linhas evolucionèron pauc en despiech de combats murtriers. En mai, la situacion dels Japonés se compliquèc. D'efiech, lor logistica èra insufisenta per avitalhar las tropas engatjaas dins la batalha. L'arribaa d'un regiment blindat agravèt lo problema e lo comandament nipon assajèt d'obtenir una victòria immediata amb d'ofensivas novelas. Pasmens, los Britanics tenguèron sas posicions. Lo 3 de julhet, la posicion japonesa èra vengüa impossibla a tenir. Lo comandament ordonèc una retiraa que se transformèc rapidament en desastre en causa de la manca de viures e de las malautiás. Au finau, los Japonés perdiguèron 53 789 òmes còntra 17 500 dins lo camp britanic. De mai, lo dispositiu japonés en Birmania èra desenant vulnerable. Ligams internesBibliografia
Nòtas e referéncias |
