Amiga L'Amiga es una familha d'ordinators personaus comercializada per Commodore International entre 1985 e 1994. Lo feble pretz de l'intrada de gamma e lei capacitats multimèdia mai avançadas que lei compatibles IBM e Macintosh d'aquela epòca l'an rendut totplen popular per leis amators de videojuecs e lei demomakers. Mai d'un detzenat d'annadas après que siegue arrestada sa produccion, demorèt una referéncia dins la scena demo, que pervenguèt a subrepassar lei demomakings PC au moment de l'Assembly 2006 amb Starstruck[1]. Au començament deis annadas 2010, la marca aparten a Amiga International, que sa politica es de licenciar l'emplec de son nom en de societats exterioras. Lo sistèma d'operacion AmigaOS es totjorn en desenvelopament e d'ordinators coma l'AmigaX1000 son produsits, emai aguesson pauc de veire amb leis Amigas classic (per aquestei versions son totjorn produsidas de cartas d'acceleracion materiala que permeton de multiplicar sei capacitats). Modèls
GeneralitatsLa familha deis ordinators Amiga èra mai que mai conoissuda per sei capacitats graficas avançadas e son arquitectura materiala particulara. L'ordinator èra bastit a l'entorn d'un processor Motorola 68000 (e seguents) qu'èra sostengut dins sa gestion deis operacions complèxas (vidèo, sons, carcul aritmetic) per de co-processors especifics a la maquina e que diferavan segond lei modèls OCS, ECS ò AGA per lei darriers Amigas comercializats. Una maquina de creacion conoissuda per sei juecsTre lo començament, Electronic Arts e Activision començan d'asatar sei produccions sus Amiga. Faudrà esperar l'arribada de Defender of the Crown, de Cinemaware, per veire enfin lei capacitats graficas superiora de la maquina de Commodore esplechadas. A la fin deis annadas 1980, l'Atari ST demòra la maquina privilegiada per desenvelopar lei juecs, e l'Amiga disposa generalament de conversions directas qu'utilizan pas sei capacitats mai avançadas. Faudrà esperar la publicacion de Shadow of the Beast en 1989 per l'editor britanic Psygnosis per començar de veire lo valat se cavar entre lei produccions especificament desenvelopadas per Amiga e leis autras. D'ara enlà, la maquina aculirà de mai en mai de juecs de qualitat, d'unei que vendràn d'alhors de grands classics dins lo monde dei videojuecs, coma Populous, Another World, Battle Squadron, Flashback, Dune, Zool ò Sensible Soccer.
|
