Thomas Crombie Schelling (* 14. April 1921 in Oakland, Kalifornien; † 13. Dezember 2016 in Bethesda, Maryland[1]) weer en US-amerikaansch Ökonom un emeriteert Perfesser för Butenpolitik, natschonale Sekerheit, nukleare Strategie un Rüstungskontrolle an de School of Public Policy vun de University of Maryland, College Park. 2005 wurr hüm för sien speeltheoretischen Analysen vun Konflikt- un Kooperatschonsszenarien de Nobelpries för Wertschapswetenschapen tospraken.
Schelling hett Ökonomie an de University of California, Berkeley studeert un hett sien Doktertitel1951 an de Harvard University maakt. In de 1940er un fröh 1950er Johren harr he verscheeden politisch Positschonen inne. So hett he an' Marshall-Plan in Europa un in dat Witt Huus arbeit. Sien eerste Professur kreeg he an de Yale University. Dornah wessel he nah Harvard.
1991 stunn Schelling de American Economic Association as wählt Präsident vör.[2]
Schelling sien bekanntst Book The Strategy of Conflict (Konfliktstrategie) legg en Grundsteen för de Beobachtung vun (nuklear-)strategisch Verhollen un wurrd as een vun de hunnert Böker sehn, de de westliche Welt siet 1945 an' meesten beinfloot hemm. Schelling seggt dorin ünner annern, dat en vullständige nukleare Afrüsten nich teelführend is, wiel dat Weeten, wu man en Atombomb baut, wiederhen vörhannen is.[3]
En anner bekannt Wark vun Schelling is Micromotives and Macrobehavior (1978), dat dat Schellingsche Segregatschonsmodell präsenteert. Dat wiest, wu Ünnerscheeden to Gruppenbillen oder Utgrenzen führen in Afhängigkeit vun Anfangsbedingungen as Antall un Verdeelen vun de Ünnerscheeden.
2005 wurr hüm tosommen mit Robert Aumann de Nobelpreis för Wertschapswetenschapen för sien speeltheoretischen Analysen tospraken.
