Roboto  Roboto esas autonoma mashino, qua esas programebla e povas realigar serio di komplexa taski automatale. Roboto konsistas ek materiaro ed ek programaro. Ol povas kontrolesar de extere, o havar enterigita programi por lua kontrolo. La formo di roboti povas esar antropomorfa (exemple ginoido (mulierala versiono dil androido) Actroid-DER), tamen la maxim multa roboti esas mashini kreita por specifika taski, senregarde estetiko, exemple industriala roboti qui exekutas soldo-procedi en industrii. EtimologioLa vorto "roboto" en Ido devenas, tra la fontolingui, de Cheka vorto robot. Ol debutis en la teatrajo Rossumovi Univerzální Roboti (Roboti Universala di Rossum) di Karel Čapek, en quo robot esis vivanta laboristo artificala. Lia fratulo Josef Čapek inventis la vorto. Pose ol signifikis homatra persono mekanikala. |
