Matrix

Matrix
Datos
Títulu orixinal	The Matrix (en)
Xéneru	cine d'aición, cine de ciencia ficción, cine de artes marciales (es) , cine postapocalíptico (es) y cine distópicu
País d'orixe	Estaos Xuníos
Estrenu	1999
Idioma orixinal	inglés
Llugar de la narración	The Matrix (en)
Ficha téunica
Direición	Lana Wachowski, Lilly Wachowski y Hermanas Wachowski (es)
Producción	Joel Silver
Música	Don Davis
Fotografía	Bill Pope
Repartu	Keanu Reeves, Laurence Fishburne, Carrie-Anne Moss y Hugo Weaving
Compañíes
Distribuidora	Warner Bros.
Enllaces esternos

Matrix ye una triloxía de películes de ciencia ficción escrites y dirixíes polos Hermanos Wachowski y protagonizaes por Keanu Reeves, Laurence Fishburne, Carrie-Anne Moss y Hugo Weaving. Fórmase por The Matrix, The Matrix Reloaded y The Matrix Revolutions; les dos postreres foron rodaes al tiempu pero estrenaes con un tiempu de diferencia, aprovechando l'éxitu de la primera. Amás, la serie de curtiumetraxes Animatrix amuesa más material, sirviendo al tiempu d'enllace ente la primera y les otres dos películes, y de tresfondu pa la triloxía, desplicando por exemplu, l'orixe y el deesendolcu de la guerra ente la humanidá y les sos creaciones. La saga convirtióse nun referente na ciencia ficción, y dalgunes de les sos escenes de llucha y desafíu de les lleis naturales foron semeyaes tanto n'otres películes como en trabayos d'aficionaos y fanáticos, pasando a ser un elementu de la cultura popular.

Argumentu

La película plantega que nel futuru, cuasi tolos seres humanos foron esclavizaos, tres una dura guerra, poles máquines y les intelixencies artificiales aniciaes. Estes tiénenlos en suspensión y coles sos mentes amecíes a una simulación social que representa la fin del sieglu XX, Matrix. Los seres humanos son usaos poles máquines pa consiguir enerxía, y los pocos humanos descendientes de los que nun cayeron nes redes de los robots o que foron lliberaos de Matrix. viven na ciudá Zion. Dende ellí, una pequeña flota de naves abállase pol sosuelu, entrando de miente clandestina a Matrix y tratando de lliberar cada vegada a más persones amecíes, esquerando a aquellos que barrunten que dalgo nun ye correutu nel ilusoriu mundu nel que viven. Dalgunos de los capitanes d'estes naves, como Morfeo (Laurence Fishburne), creyen qu'hai dalguién en Matrix que ye L'elixíu, la persona qu'acabará cola guerra, coles máquines, según una antigua profecía. Morfeo fíxase en Neo (Keanu Reeves), un pirata informáticu que vive allancáu en Matrix ensin sabelo, cuidando qu'él puede ser L'elixíu. Neo ye lliberao per aciu de l'acción de Trinity (Carrie-Anne Moss), miembru de la tripulación de Morfeo, pero al tiempu ye perseguío por unos programes de Matrix, los axentes, lideraos por Smith (Hugo Weaving), que quieren acceder a los ordenadores de Zion pola mor de la traición d'otru subordináu de Morfeo, Cypher. Los axentes consiguen prindar a Morfeo y Neo ye forciao a rescatalu arriesgando la so vida. A la fin de la primer película Neo espéyase como L'elixíu y acaba con Smith. Nes siguientes entregues, l'acción dixébrase ente la realidá, onde las máquinas deciden atacar direutamente Zion, y el mundu virtual, onde Smith ta infestando Matrix como un virus.

Personaxes cimeros

Neo: de nome real Thomas A. Anderson, ye un programador qu'amás actúa como pirata informáticu, y que ya albidró que dalgo ta mal nel so mundu, polo qu'intenta contautar con Morfeo, anque hasta que nun lu conoz nun se pon al tanto de la situación. Una vegada fuera de Matrix, Neo veráse obligao a tomar sobre los sos hombros el destín de toos.
Morfeo: capitán de la nave Nebuchadnezzar, cimeru defensor de la corriente que defende la esistencia del elixíu y el que llibera a Neo de Matrix.
Trinity: tripulante de Morfeo, aída a lliberar a Neo y lluegu namórase d'él.
Axente Smith: programa de Matrix que primero trabaya pa ella y llueu pasa a ser un virus intentando dominala.
Oráculo: programa de Matrix col aspeutu d'una muyer mayor que ta al llau de Morfeo que-y cunta coses por venir y información sobre L'elixíu.
Níobe: capitana de la nave The Logos, que una vegada foi pareya de Morfeo.
Merovinh.io: programa de Matrix qu'actúa al marxe d'ella, protexendo a otros programas de ser borraos, siempre y cuando pueda utilizalos pal so interés.
Perséfone: esposa de Merovinh.io.
El Cerrah.ero: programa que ye quien a aniciar llaves pa toles puertes qu'hai en Matrix.
Seraph: siervu y guardián del Oráculo.
Arquitecto: programa de Matrix qu'equilibra la forma en que ta programada la simulación, y ún de los pocos que conocen la verdadera hestoria de la mesma.

Zero One

Zero One o 01 ye la ciudá onde tán les máquines dotaes d'intelixencia artificial. Foi fundada dempués del destierru del mundu humanu. Ta allugada n'Oriente Mediu, la cuna de la civilización humana. 01 entamó a prosperar rápido, el so mercáu medraba colos sos productos de calidá, dexando atrás a los productos manufacturaos polos humanos. Esto produciría una gran recesión na economía humana, fechu que provocó enveya y enoyu de los grandes líderes. Asina foi como 01 entamó a ser acosada, recibiendo embargos y bloqueos. Hasta que la situación se desbordó y principió los ataques militares. Animatrix mienta esto como'l "Segundo Renacimientu". Foi asina como 01 entamó a espardese y conquistar territorios humanos cuasi ensin resistencia. Durante'l curtiu "El Segundu Renacimientu", d'Animatrix, amuésase como foi nel so entamu y dempués tórnase a amosar en The Matrix Revolutions, cuando Neo y Trinity se dirixen a ella. Ta defendida por una bona barrera práuticamente infranqueable de máquines de combate xigantesques y centineles apostaos en tierra que s'activaron cuando la Logos s'averaba.

Temática

La película destaca por amosar el conceptu clásicu de la filosofía sobre si'l mundu alredor ye real o ficticiu (teoría de los dos mundos de Platón).
Espeya'l problema amosáu pola ciencia ficción, cimeramente de la obra Neuromante (Neuromancer) de William Gibson (cola que comparte munches semeyances) y en lliteratura sobre robots (les obres d'Isaac Asimov, por exemplu, opónense a esta posibilidá), como en películes como 2001: Una odisea del espacio, Terminator y I, Robot (que se centren n'ella, sobre la posibilidá de que les máquines y la intelixencia artificial aniciaes pol home se rebelaren escontra él.
L'argumentu de The Matrix ye semeyáu al descritu nes Memories d'Ijon Tichy, del escritor polacu Stanislaw Lem. Nel capítulu 1 descríbese al profesor Corcorán, qu'aniciara universos mecánicos con seres virtuales. Al igual qu'en Matrix, nestos universos mecánicos esistíen espíritus, adivinadores y los deja-vu asocedíen por pequeñes anomalíes (aire, una formiga) nos sos elementos mecánicos.
Les estremaes interpretaciones de The Matrix vienen de la filosofía de George Berkeley, incluyendo la charra ente Smith y Cifra na primera película de la triloxía.
La idea d'un mundu non real al que se percibe como real ye una alegoría sobre l'alienación denunciada por ciertos postulaos filosóficos, onde la idea de la Matrix sirve como parábola pa ilustrar el conceptu d'una falsa realidá opresiva y alienadora, descrita d'estremaes formes por esetremaos filósofos, como los Maestros de la sospecha Karl Marx y Friedrich Nietzxche, y tamién poles filosofíes orientales como'l Buddhismu y el Taoísmu, les cuales representen la idea d'una falsa realidá enayenadora baxo'l nome d'Ilusión.

Según el filósofu William Irvin: "Matrix" ye la película más filosófica que se tenga fecho nunca, cada pasu del so vetixinosu argumentu puede amecese con dalgún problema filosóficu. Si'l mundu que conocemos nun ye más qu'un suañu virtual nuesu, ¿torna eso al suañu en realidá? Si tuviéramos la posibilidá de salir d'esi mundu suañáu pa tornar a otru más real pero menos pretosu -tomar la pastilla roxa- ¿sería un fracasu moral nun facelo? ¿Por qué los seres humanos son más valederos qu'eventuales futuros mecanismos electrónicos intelixentes? ¿Puede vivir la mente ensin el cuerpu o'l cuerpu ensin la mente?".