Kappa Herculis AKappa Herculis A (κ Herculis A / 7 Herculis A / HD 145001 / HR 6008) ye una estrella na constelación d'Hércules de magnitú aparente +5,00.[10] Visualmente separada 27 segundos d'arcu de Kappa Herculis B, anguaño piénsase que les dos estrelles nun tán físicamente rellacionaes, constituyendo una doble óptica. Ente que Kappa Herculis A alcuéntrase a 388 años lluz del Sistema Solar, Kappa Herculis B alcuéntrase a 471 años lluz, magar esta postrera midida ta acomuñada a un ampliu marxe d'error. Les dos estrelles son dacuando conocíes como Marsik o Marsic —«el coldu» n'árabe, pola so posición na figura del héroe—, nome utilizáu tamién pa designar a λ Ophiuchi.[11] Kappa Herculis A ye una xigante mariella de tipu espectral G8 III[10] con una temperatura de 4990 K. La so lluminosidá ye 150 vegaes mayor que la lluminosidá solar y, como xigante que ye, tien un diámetru 16 vegaes más grande que'l del Sol. El so periodu de rotación ye igual o inferior a 80 díes. Tien una metalicidá un 30% inferior a la del Sol. La so masa ye 3 vegaes mayor que la masa solar y la so edá envalórase en 400 millones d'años.[12] Per otra parte, una tenue estrella de magnitú +13,6 a pocu más d'un minutu d'arcu de Kappa Herculis A, sí paez formar un sistema binariu con ella. Probablemente sía una nana naranxa, dixebrada siquier 7500 UA de la brillosa xigante mariella, que'l so periodu orbital taría percima de los 340.000 años.[12] Referencies
|
