Islla Flint
La islla Flint ye un atolón despobláu na área central del océanu Pacíficu, y forma parte de les islles de la Llinia, pertenecientes a la República de Kiribati. XeografíaLa islla Flint ta allugada alredor de 740 kilómetros al noroeste de Tahití, 190 km al sursureste de la islla Vostok, y 220 km al sudoeste de la islla Carolina. La islla tien 4 km de llargu y 0.8 km d'anchu. Tien un área terrestre de 3 km², alcuéntrase a 685 milles náutiques al sur del ecuador, y álzase hasta 8 m s.n.m. L'aguaxe ruempe con fuerza nel llau este y tamién, en cierta midida, nel llau de sotaventu. Nun hai un sitiu seguru pa fondiar. Desembarcar nun ye fácil, nin siquier nun puntu del llau noroeste onde s'abrió una rompiente al traviés del petón de franxa.[1][2] Según la Espedición d'Esploración de los Estaos Xuníos (5 de febreru de 1841), la islla taba densamente arbolada, sicasí, agora ta na so mayor parte cubierta de palmeres de cocu. HistoriaSegún se afirma n'Esposición Pacíficu, España y l'aventura de la Mar del Sur, yá Magallanes y la so flota, na primer circunnavegación del mundu (1519-1522) terminada por Juan Sebastián Elcano acolumbraron lo qu'ellos llamaron les islles Desventuraes, identificaes seique coles islles Pukapuka y les Flint en 1521. La islla foi redescubierta en 1801 y nomada pol capitán Keen en 1835. Impúsose so l'Acta d'Isles Guaneras de 1856, pero aparentemente nunca foi ocupada. La islla foi arrendada pola compañía británica Houlder Brothers and Co., de Londres, que llevó a cabo excavaciones na parte central de la islla coles mires d'estrayer guanu. Estes operaciones, qu'asocedieron de 1875 a 1880, taben so la xerencia del alministrador en xefe John T. Arundel. De magar, les árees escavaes enllenáronse d'agua salobre, formando dos o trés llagunes pequeñes. En 1881, Arundel llantó palmeres de cocu na islla, y producióse copra hasta 1891. En 1911, la islla foi arrendada nuevamente a S. R. Maxwell and Co., Ltd., compañía qu'emplegó 30 homes y un xerente para collechar copra d'aprosimao 30.000 palmeres de cocu. El 3 de xineru de 1908, una espedición del Observatoriu Lick de California pudo reparar dende la islla un eclís solar total. ReferenciesEnllaces esternos
|
||||||||||||||||||||||||||||||||
