Constantín X Ducas (1006 (greg.), Anatolia – 22 de mayu de 1067, Constantinopla) foi emperador del Imperiu bizantín ente 1059 y 1067. Foi nomáu socesor por Isaac Comneno, antes de retirase a un monesteriu, gracies al conseyu de Miguel Psellos.
Constantín taba casáu con Eudoxia Macrembolitissa, sobrina de Miguel Cerulario. Tanto Eudoxia como Miguel Psello fueron figures bien poderoses mientres el so reináu. Valedor de l'aristocracia civil de Constantinopla, foi abondo impopular. Llindó considerablemente'l financiamientu del exércitu, lo que se tradució n'importantes perdes territoriales. Mientres el so reináu, perdiéronse cuasi toles posesiones bizantines n'Italia (sacante un exiguo territoriu alredor de Bari) a manes del normandu Roberto Guiscardo; tamién se producieron les invasiones de los selyúcides, empuestos por Alp Arslan, quien conquistaron Armenia y Capadocia. Constantín, que yá yera vieyu cuando aportó al poder, morrió en 1067.
